〈202〉

正月正，聽見po̍ah-kiáu聲

Chiaⁿ-goe̍h-chiaⁿ, thiaⁿ-kìⁿ poa̍h-kiáu siaⁿ

「正月正，聽見po̍ah-kiáu聲，」二月二，boeh敬老土地…，chiah念到chia，學生to̍h 1-ê 1-ê笑kah嘴á開開。為siáⁿ-mih聽見po̍ah-kiáu聲，chia ê長青組老人班ê學生ē感覺chiah好笑--leh？因為in真了解，台灣人leh過年，正月初一chit工是boeh án-chóaⁿ過--ê，無po̍ah-kiáu，無，boeh創saⁿh？

台灣人，真正有影sêng台灣牛，為tio̍h生活，大部分ê人kan-nā ē-hiáu戇做，透早落田到黃昏，天phah-phú to̍h又koh想boeh做khang-khòe，罕得tn̄g tio̍h年節ê時chūn，mā是閒bē-tiâu，厝前後壁chhōe透透，chhōe看有siáⁿ-mih穡頭來tín動，pùn間tio̍h piàⁿ，厝頂ē漏，á是牛犁耙tio̍h收，菜瓜棚á tio̍h搭，khah做mā做bē了。To̍h是án-ne做，án-ne piàⁿ，tn̄g tio̍h êng-sian-sian ê時chūn，soah m̄知boeh án-chóaⁿ？正月正，只好po̍ah-kiáu bóng gī-niū。

莫怪台灣人ài ut-chut，ē-hiáu看人做戲，bē-hiáu娛樂ka-tī，過去年節有thang看鬧熱，iáu koh批評講做戲khong，看戲戇，叫伊ka-tī表演，講無leh hiān-sì，表演無好m̄ tio̍h hō͘人笑sông。雖然講chit-mái時代有改變，跳舞唱歌ê人有khah chē，m̄敢hiān-sì ê人mā bē少，台灣人boeh像外國人án-ne放ē開ê個性tio̍h鼓勵，siáⁿ-mih時代？也m̄是做pháiⁿ，也m̄是開錢siuⁿ厲害，適當來跳--一-下，haiⁿ--一-曲-à，總是比po̍ah-kiáu鬱tiâu--leh有khah贏。

【註解】