〈206〉

有人教kiáⁿ泅、無人教kiáⁿ peh-chiūⁿ樹

Ū lâng kà kiáⁿ siû, bô lâng kà kiáⁿ peh chiūⁿ chhiū

講tio̍h泅水phah-pōng-siû，心內tio̍h感覺chiâⁿ怨嘆，三十外年前讀台中師範ê時，游泳課tio̍h學ē-háiu禁氣、浮水面泅五、六公尺，可惜到taⁿ，講tio̍h泅水，猶原bē-hiáu換氣，無才調泅真遠。做兵hit chām，朋友教我chúi-ke-á泅（蛙泳），三泅四泅soah倒退lu，bē行進前，有夠落氣，可見泅水chit層tāi無簡單，tio̍h ài認真學chiah ē-hiáu。

泅水tio̍h學，學ē-hiáu thang運動，泅水實在是一項siāng好ê運動，全身運動透透，koh ē-tàng kui身按摩，bē運動傷害，mā ē-tàng救人救ka-tī。人bē-tàng掛無事牌，萬一nā tn̄g--tio̍h水災á是水禍，bē-hiáu泅水to̍h悽慘tāi，所以做爸母--ê ài ē-hiáu教kiáⁿ學泅水。

Peh樹á gín-á siāng愛，peh koân peh kē gín-á siāng ē，peh樹á thit-thô gín-á siāng sóng，m̄-kú gín-á peh樹á，序大人ē lia̍h狂，做爸母--ê總是驚gín-á peh樹á，nā無tú好天頂po̍ah--落-來，是siáⁿ款tāi，免想你mā知，摔一下無死siāng ka-chài，輕--ê chhè破皮，重--ê ē斷腳骨，瘸腳破相你to̍h知，m̄-chiah講「無人教kiáⁿ peh-chiūⁿ樹。」

「有人教kiáⁿ泅、無人教kiáⁿ peh-chiūⁿ樹。」做爸母ê人tio̍h研究，siáⁿ-mih ài教，siáⁿ-mih m̄-thang，為tio̍h kiáⁿ兒ê成長，需要關心，mā需要學習，tio̍h m̄ tio̍h tio̍h-ài ka-tī斟酌想。

【註解】