〈188〉

未做娘先做kán

Bōe chò niû seng chò kán

「Kán！Mài吵--lah！阿吉--á，boeh sńg恁去sńg--lah！我boeh寫字。」 「Kán！M̄ to̍h mài，hiah大聲創saⁿh？阮boeh來去--à-ō͘！」

「未做娘先做kán」，屘叔á！Gín-á人m̄-thang kah人烏白講，kán，kám hiah好做是--bò͘？Cha-bó͘-kán-á是leh服侍a-niû-á--ê，你cha-po͘ gín-á m̄-thang kah人講kán。」 「Hò͘！Án-ne hio͘h！」

Che是五十年前Siau Lah-jih ê二嫂ùi一句垃圾話「kàn…」ka chōaiⁿ-chò（轉做）cha-bó͘- kán-á ê kán（𡢃）去，二嫂ê教示緊記在心，到taⁿ將近boeh五十冬--a m̄敢講出一句lah-sap話。

「未做娘先做kán」，是教人做人tio̍h艱苦頭，chiah有快活尾，少年時tio̍h khah phah-piàⁿ，kut-la̍t做kut-la̍t學--leh，將來chiah有thang做頭家，享受親像做a-niû-á án-ne，有人侍候，有人服侍。Ē--ê出嘴，是tio̍h經過食苦經營chiah得ē tio̍h--ê，m̄是chhìn-chhái to̍h有才調kā人喝起喝倒--ê neh。

「未做娘先做kán」，nā boeh做師傅，請你先做師á工，一步一步來，有一工成功一定是你ê。

註：台語變調真趣味，「kán」，是第二聲，to̍h是cha-bó͘-kán-á ê kán；「kàn」，是第三聲，是罵人ê話「kàn-in-niâ」ê kàn，因為Siau Lah-jih細漢to̍h真古意，m̄敢講lah-sap話，所以一句「kàn-in-niâ」m̄敢講kah soah，kan-nā講「kàn…」to̍h擋--leh，soah變做「kán」，第二調，cha-bó͘-kán ê kán。

【註解】