〈213〉

Nǹg燈腳，生lān-pha

Nǹg teng kha, seⁿ lān-pha

Lān-pha lān-pha生lān-pha，大漢chiah ē做阿爸； 生tio̍h cha-bó͘ gín-á-phí，是boeh-nî，食了米，m̄ chiâⁿ chi。

朋友！新正年頭m̄-thang kioh是Siau Lah-jih leh老不修，講hit-lō有空無sún ê lah-sap話，boeh論男女平權ê問題，提出咱對男女生殖器ê看法態度，mā ē-tàng了解--一-寡，你ka看，講tio̍h cha-po͘-kiáⁿ、cha-po͘孫，m̄管老爸a̍h老母，阿公a̍h阿媽，ta̍k-ê嘴á笑微微：生lān-pha--lah！有lān鳥ŏ͘！Ah nā生tio̍h cha-bó͘--ê，m̄是講母--ê，to̍h是cha-bó͘ gín-á-phí，有ê阿媽講koh khah pháiⁿ聽：生kah he chi-bai-á，m̄ chiâⁿ chi，食了米。M̄-nā pháiⁿ聽，koh顯示生tio̍h cha-bó͘ gín-á ê無奈。

Ná ē án-ne？M̄知是受tio̍h漢文化ê影響，a̍h是台灣人本chiâⁿ tio̍h重男輕女，thái ē chiah-nī注重cha-po͘-kiáⁿ，好ka-chài，時代tòe tio̍h世界潮流teh進步，chit-mái ê人有影khah開化，知影cha-po͘、cha-bó͘ lóng是kiáⁿ，生--tio̍h to̍h好，lóng ē ka疼，lóng boeh ka chhiâⁿ，m̄-kú祖先留落來ê風俗，猶原支配tio̍h咱ê生活，親像正月十五元宵節，to̍h有hit-lō「Nǹg燈腳，生lān-pha」ê迷信存在。

正月十五元宵節，koh叫做上元節，是天官大帝（堯帝）ê生日，是1-ê小過年，各所在廟寺有花燈展覽，ta̍k-ê挨挨陣陣看鬧熱賞花燈，想boeh生cha-po͘-kiáⁿ ê cha-bó͘人，相招看花燈，sūn-sòa nǹg一下á燈腳，看有影冬尾á a̍h是明年ē生1-ê-á lān-pha--無！

Nǹg bóng nǹg，ka看做1-ê民俗to̍h好，m̄-thang kioh是真--ê，其實ta̍k-ê巧巧--leh，應該bē相信chiah tio̍h，nā無是boeh án-chóaⁿ kah人算新時代ê女性neh，不過--hòⁿ，民俗是民俗，未嫁ang ê cha-bó͘ gín-á，你tio̍h m̄-thang kah人好sńg也boeh去nǹg--ō͘，he是ē hông笑--ŏ͘！

【註解】