〈182〉

捷phah ná phah-phek，捷罵ná唱曲

Chia̍p phah ná phah-phek, chia̍p mē ná chhiùⁿ-khek

音樂ê基本要素是旋律kah節奏，旋律是樂器、歌聲ê kôan低音音階變化，節奏是曲調ê緊慢、輕重、長短，有旋律chiah ē好聽，有節奏chiah有韻味。

南管音樂用琵琶、洞簫、二弦奏出旋律，a̍h是用人聲唱出曲調，由phek-pán phah pán-liâu，旋律柔和，節奏輕鬆、寬寬、慢慢，非常好聽。

愛ê教育tio̍h ài像唱南管án-ne，輕聲細說，liâu-liâu-á是，寬寬á教，ài有觀音佛祖ê慈悲，媽祖婆ê心腸，一時間nā教bē來，tio̍h ài小忍耐，免tio̍h急，m̄-thang火氣一下giâ，kha̍p-bē-tio̍h to̍h來一頓筍絲炒薑絲，竹枝炒肉絲，m̄是罵，to̍h是phah，án-ne gín-á是ē驚--tio̍h，boeh ài gín-á好，soah hō͘ gín-á siuⁿ負擔，心內táⁿ-hiáⁿ不安，而且驚久tio̍h變成蠻皮，án-ne tio̍h m̄是教育ê本意--lò͘。Kám講gín-á ê皮jūn，m̄驚phah，每1-pái nā boeh phah學生，tio̍h先ka-tī手蹄á phah看māi，aih-ioh！疼tiuh-tiuh，想想--leh實在phah bē落手。

「捷phah ná phah-phek，捷罵ná唱曲」，有影--lah！罵久tio̍h麻痺，phah久mā ē蠻皮，kám m̄是leh。「捷phah ná phah-phek，捷罵ná唱曲」ē用得tī教gín-á ê時做參考，m̄免罵to̍h mài罵，無需要phah to̍h mài phah。「捷罵ná唱曲」chit句mā ē-sái-tit用tī cha-bó͘人leh管ang婿，當然--lah，管ang婿nā管kah tio̍h「捷phah ná phah-phek」，he tio̍h猴行neh腳尾，tāi-chì大條--lò͘。

【註解】