〈164〉

暗暗á bong，生cha-po͘

Àm-àm-á bong, seⁿ cha-po͘

畚箕湖十八羅漢洞ê山路實在讚，路草chiâⁿ少用紅毛土khōng，大部分順其自然起落，行起來thióng-á（ē-tàng）節各人ê腳力行踏，pháiⁿ行ê路段上加鋪1-gám 1-gám ê石板a̍h是chám木á niâ，好行好徙腳，khah無khōng紅毛土崁hiah-nī固定，hō͘人行起來1-khám一步，重心lóng khǹg tī kāng肢腳，腳步無聊koh khah緊腳酸。

十八羅漢洞因為新生代造山運動ê關係，造成1-kâi 1-kâi ê地穴，林--先生紹介阮3-ê khah特色ê洞穴，實在刺激好sńg，洞穴有大有細，peh koân落低，簡單--ê用手pan，用腳neh，pháiⁿ khàng--ê tio̍h ài腳手齊tín動，有tang時á koh tio̍h用尻川phóe tàu lu，講危險無危險，m̄-kú nā一下無張持，腳頭u chhè破皮，腳盤náu--tio̍h，lóng有可能，所以ta̍k-ê lóng chiâⁿ小心chiâⁿ sè-jī，hiông-hiông傳來林--先生ê sńg笑：「暗暗á bong，生cha-po͘」--ō͘！有影洞內暗bin-bong，靠一支手電á火ná看ē清？

「Boeh生cha-po͘ kiáⁿ--ê khah緊bong--ò͘！」 「Boeh生讓lín生，láu陳--ê，lín已經3-ê cha-bó͘ kiáⁿ，khah緊bong，看ē生1-ê cha-po͘ kiáⁿ--無！」

阮chit陣，m̄是五十外，to̍h是六十外，講tio̍h飲食男女，ta̍k-ê內行kah，siáⁿ-mih笑詼大面神ê垃圾話，風神話，keng-thé兼chau-that，lóng講ē出chhùi，koán-thāi-i老不修a̍h是三八chi，歡喜to̍h是。Chit-mái ê人to̍h是án-ne，chia講chia soah，歡喜bī-sī。 「暗暗á bong，生cha-po͘」，無chit-lō tāi，生cha-po͘ a̍h生cha-bó͘，大自然有安排，siāng好mài用人工來牽礙。Siau Lah-jih boeh kā ta̍k-ê交待，boeh來十八羅漢洞thit-thô，手電á m̄-thang bē記--得，tio̍h穿有牙ê運動鞋，cha-bó͘人ài穿長褲，因為ài peh koân koh peh低，khah好勢，mā khah bē pháiⁿ勢。

【註解】