〈011〉

一hoān一，二hoān二

Chi̍t hoān chi̍t, nn̄g hoān nn̄g

Chi̍t to̍h是chi̍t，nn̄g to̍h是nn̄g，chiah簡單ê數字連五、六歲gín-á都bat，ná有sáⁿ-mih thang-hó議論--ê，是m̄是leh無話講ka-ló？

Chi̍t to̍h是chi̍t，nn̄g to̍h是nn̄g，nā ka換做「Chi̍t hoān chi̍t，nn̄g hoān nn̄g」，意思to̍h完全無sio-kāng。

做人ê道理，紅燈to̍h是紅燈，上班八點鐘to̍h是上班八點鐘，叫你行正pêng你to̍h行正pêng，án-ne to̍h無簡單--a，kám m̄是？

Chi̍t to̍h是chi̍t，nn̄g to̍h是nn̄g chit種觀念，to̍h是現代民主國家ê法治觀念，你ka想看māi--leh，咱ê政府官員，食頭路人，做法官--ê，做警察--ê……，ta̍k-ke lóng公私分明，「Chi̍t to̍h是chi̍t，nn̄g to̍h是nn̄g」，bē歪哥，bē lo̍k-thô，án-ne m̄知boeh gōa-ni̍h好--leh！行政效率好，國庫錢多多，有建設有福利，有o-ló，有『快樂』。

「法律頭前人人平等」，siáⁿ-mih tāi-chì lóng ài憑情理，情、理、法應該「法」做頭前，執法者「藤條giâ tī手，無分親chiâⁿ kah朋友」，chit種鐵面無私ê做法hō͘人感覺khah ngē-táu；當然--lò͘，nā是私底下kah人交陪，你boeh án-chóaⁿ對待人，是你做人ê分寸，boeh來「買賣算分，相請無論」mā好，á是boeh「魚hoān魚，蝦hoān蝦」kah人計較一ē-á清楚，mā無要緊。

【註解】