〈129〉

Phah鐵趁jia̍t，lim茶趁燒，食飯ài tòe人ē tio̍h

Phah thih thàn jia̍t, lim tê thàn sio, chia̍h pn̄g ài tòe lâng ē-tio̍h

Khin khiang！Khin khiang！M̄是teh喝lin-long賣雜細，he是phah鐵師ê phah鐵聲，一ē來，一ē去，一目nih一支菜刀phah kah好勢好勢。Phah鐵進前ài pû火，一塊鐵á pû紅紅，火挾挾--起-來摃槌á齊tín動，「phah鐵趁jia̍t（熱）」khah省工，khah輕鬆，nā是hō͘伊冷--去to̍h bô-chhái工，tio̍h koh重新了戇工。

做tāi-chì做事業，kah phah鐵kāng一款，見機行事，掌握好時機，開始tio̍h kut-la̍t piàⁿ，認真計劃，piàⁿ勢突破，營造成功ê契機（khè-ki），包領bē輸一定贏。『打鐵趁熱，說做就做』，時機nā過chiah boeh piàⁿ，成功ê人無你ê名，做事業ê朋友，少年得意ài繼續piàⁿ，m̄-thang頭á燒燒，尾á冷冷，五分鐘ê熱度niā-niā，án-ne ê人生路to̍h真pháiⁿ紡真pháiⁿ行。

「Phah鐵趁jia̍t，lim茶趁燒，食飯ài tòe人ē tio̍h。」M̄是講好聽，lim茶趁燒ta̍k-ê lóng知影，食飯ài tòe人ē tio̍h m̄-chiah有才調kah人piàⁿ，食飯nā tòe人bē tio̍h，ná有氣力piàⁿ贏。總講一句，「phah鐵趁jia̍t」siāng有影。

【註解】