〈168〉

講到hō͘你bat，嘴鬚好phah結

Kóng kàu hō͘ lí bat, chhùi-chhiu hó phah-kat

頂禮拜學校宣佈chit拜六boeh舉行大隊接力比賽，講tio̍h走相jiok，學生gín-á ta̍k-ê lóng hèng-chhih-chhih，等到今á日，透早to̍h鬧熱滾滾，運動埕ta̍k四界lóng是leh走相jiok ê練習，當然Siau Lah-jih教ê班級mā ài指導，chiah三年--ê niā-niā，講tio̍h走相jiok，kan-nā ē-hiáu chhi̍h-chhi̍h-chòaⁿ，án-chóaⁿ接管á？Án-chóaⁿ搶跑道，1-sut á都無觀念，無先實地練習看māi--leh，到時銃聲一下響，kám m̄知boeh走tùi tó位--去？He tio̍h笑詼--lò͘。

比賽結果，第一名，ŏa！不得了，bē直--à， 「老師！Ái請阮--ō͘！」 「人阮有聽老師ê話neh！」 「老師！第一名，有獎品無？」 好--lah！好--lah！恁mài吵，獎品ta̍k-ê有份，後禮拜老師請恁食柑á糖，chit-mái ta̍k-ê聽老師分析，講咱ê缺點，做後pái ê參考，chit pái ê勝利，是別人錯誤khah chē，咱錯誤khah少，m̄是咱khah gâu走ê原因。

比賽ài用心，接管á tio̍h準，m̄-thang phah ka-la̍uh，接tio̍h管á tio̍h ài piàⁿ勢lōng，mài越頭看，mài kah人相tōng（撞），boeh接管ê人tio̍h認ho͘真，管á交hō͘別人tio̍h謹慎，失誤jú少，贏ê機會，chiah有咱ê份。

接管á ê技術，tio̍h án-ne：正手交tò手，交hō͘頭前ê人，頭前ê人boeh接手iap後，koh tio̍h半行半走…… 「老師！你講siaⁿh？」 Ŏa！Piàng--à！聽lóng無，m̄知老師tī-leh講siáⁿ-mih碗糕？ 有影都tio̍h，「講到hō͘你bat，嘴鬚好phah結。」 「老師！你koh leh講siáⁿ-mih？」 老師leh講「講到hō͘你bat，嘴鬚好phah結」--lah！ 「老師ê嘴鬚三日無khau無jōa長，nā boeh嘴鬚長kah好phah結ài jōa久？」 「足久--ê！」 Tio̍h！一禮拜，兩禮拜，三禮拜，ài足久--ê，接力比賽ê方法nā boeh講hō͘恁知，講kah hō͘恁ē瞭解，tio̍h ài聽候後pái。 「講到hō͘你bat，嘴鬚好phah結。」Mài koh講--落-去khah實在。

【註解】