〈029〉

Khiā厝tio̍h好厝邊，作田tio̍h好田邊

Khiā chhù tio̍h hó chhù-piⁿ, choh-chhân tio̍h hó chhân piⁿ

Khiā厝tio̍h好厝邊：

Khiā厝nā tn̄g tio̍h好厝邊，生活ē輕鬆，ta̍k-ke lóng是出外人，互相相疼痛，有tāi-chì咱to̍h-ài鬥幫忙；nā是tn̄g tio̍h pháiⁿ厝邊，你讓我，講bē-tàng，我拜託你，sian m̄-thang，chit款厝邊真pháiⁿ紡。

作田tio̍h好田邊：

作田作tio̍h好田邊，ta̍k-ke互相tàu-saⁿ-kāng，你boeh巡田水，sūn-sòa幫我看，nā boeh送點心，我來kā你kōaⁿ。

Nā是tn̄g tio̍h pháiⁿ田邊，每冬冤家hit條田岸，你ê田m̄ hō͘我過，boeh行我ê路你kám káⁿ？Chit款田邊真têng-tâⁿ！

Khiā厝boeh ài好厝邊，作田boeh有好田邊，tāi-seng我to̍h kah你tàu-saⁿ-kāng，好處先做hō͘別人，是m̄是，先問ka-kī，好m̄好，先kā人o-ló。Nā是án-ne做，「敦親睦鄰，守望相助」ê社區營造，一定第一好。

詞	解說
厝	Khiā-chhù，khiā-ke，『居家』。
相疼痛	Sio-thiàⁿ-thàng。
Bē-tàng	Bē使。
Sian m̄-thang	Án-chóaⁿ講lóng bē使--chit。
Pháiⁿ紡	Pháiⁿ-pháng，pháiⁿ應付。
作田	Choh-chhân，『種田』，m̄是做田（chò 田）。
Kā你kōaⁿ	Kā-lí-kōaⁿ，『跟你提』。
Kám káⁿ	『敢嗎』。
Têng-tâⁿ	想法m̄ tio̍h。
敦親睦鄰，守望相助	Tun-chhin bo̍k-lîn，siú-bōng siang-chō͘。
社區營造	Siā-khu êng-chō。