〈218〉
Giâ筆比giâ鋤頭khah重
Giâ pit pí giâ tî-thâu khah tāng
庄--裡hia ê老歲á bat字班ê阿公、阿媽，實在ē o-ló--得，每禮拜二暗，老師未到位，in ta̍k-ê to̍h hām學生gín-á kāng款，坐好好leh等老師來上課。
各位小朋友！Ah，m̄ tio̍h。各位老朋友！Ah，mā m̄ tio̍h。Án-ne好--lah！ 各位同學：以後咱tī上課中，老師to̍h án-ne kā恁稱呼，恁mā ài叫我老師--ŏ͘！…… 各位同學：Chit-mái咱來學寫字。 學生：也tio̍h寫字--ò͘！ 老師：Hèⁿ！Bóng學寫--lah！咱ùi好寫ê字先學，一字一字來，mài緊張！ 學生：Ā有法度，kan-nā giâ鉛筆to̍h giâ kah phi̍h-phi̍h-chhoah！ 學生：「Giâ筆比giâ鋤頭khah重。」也m̄-bat giâ過鉛筆，老師！是Boeh án-chóaⁿ giâ？ 學生：老師！我giâ án-ne tio̍h--無？ 老師：Tio̍h！Tio̍h！Tio̍h！To̍h是án-ne giâ，ta̍k-ê看老師án-chóaⁿ giâ！ 老師：無要緊！慢慢á來，看烏枋，1-hoâiⁿ，2-hoâiⁿ，3-hoâiⁿ，án-ne to̍h是三。3-hoâiⁿ無平長--ō͘！M̄是三枝柴á，án-ne ngē piang-piang m̄-tio̍h。 學生：老師！我寫án-ne好--無！ 老師：Bē-bái！Bē-bái！鉛筆免giâ kah hiah短，giâ siuⁿ短真pháiⁿ寫。………
有影，「giâ筆比giâ鋤頭khah重。」勞心--者giâ筆，勞力--者giâ鋤頭，siāng gâu ê人是ē-hiáu giâ筆koh ē-hiáu giâ鋤頭。
【註解】
| 詞 | 解說 |
| Giâ筆 | 『拿筆』，gia̍h筆？音韻m̄ tio̍h。 |
| Giâ鋤頭 | 『拿鋤頭』。 |
| Hia ê | 『那些』。 |
| M̄-tio̍h | 『不對』。 |
| Ùi | 『從』。 |
| Phi̍h-phi̍h-chhoah | 『顫抖』。 |
| 柴á | Chhâ-á，『細棍子』。 |
| Ngē piang-piang | 『硬邦邦』。 |
| Bē-bái | 『不錯』。 |
| Gâu | 『能幹』。 |