〈190〉

草地鑼鼓，chhi̍t-tong chhi̍t-tong chhaⁿh（一冬一冬慘）

Chháu-tē lô-kó͘, chhi̍t-tong chhi̍t-tong chhaⁿh

門外傳來1-chūn 1-chūn ê鑼鼓聲： Tong-tong chhaⁿh！Tong-tong chhaⁿh！Tong-tong chhi̍t-tong chhi̍t-tong chhaⁿh！（咚咚chhaⁿh！咚咚chhaⁿh！咚咚一冬一冬慘！）

是庄腳獅陣leh弄獅，鑼鼓聲jú來jú大聲。有khah choa̍h！時機一月日一月日bái，頂kó͘月iáu做有chiâⁿ十萬（kho͘）生理，chit kó͘月已經過月半，iáu做無兩萬，kan-nā納厝稅都無夠，實在有夠慘，aih！「草地鑼鼓，chhi̍t-tong chhi̍t-tong chhaⁿh。」一冬不比一冬--lo͘h！

！Bóng-haiⁿ，tó一年聽lín走外務--ê leh喝好báu、好趁，m̄是ta̍k年喝bái，ta̍k年賺ka̍h，ē hiaⁿ chiah有醫。

講真--ê，景氣真bái neh？你kám無看報紙，匯價創十年八kó͘月新低，新台票已經破33 kho͘，食品原料、進口汽車又koh boeh起價，生理pháiⁿ做，無kā你騙。

Kám án-ne？Che無研究，總是看ē出來今年景氣有影無好，kài-sêng「草地鑼鼓，chhi̍t-tong chhi̍t-tong chhaⁿh。」一冬比一冬慘。

【註解】