〈155〉

路邊尿桶，眾人sōan

Lō͘-piⁿ jiō-tháng chiòng-lâng soān

Sōan，有三種意思：Sōan尿，sōan桶；罵人ê意思，用sōan--ê，sōan in niâ，kàn tōng sōan；soān石，sōan-á。 尿桶是boeh hō͘人sōan尿--ê，khǹg-tī路邊ê尿桶，只要是cha-po͘人，ta̍k-ê lóng mā ē-sái-tit sōan尿，cha-po͘人--mà，尿nā緊到--à，péng起來to̍h sōan，有影khah無雅觀khah無禮貌，不過sōan bóng sōan，kah cha-bó͘、性，一點á都無關係，mā無siáⁿ-mih曖昧ê意思。

做人nā khah無差不多，見做to̍h是傷天害理ê tāi-chì，m̄是thâi人放火，to̍h是強姦婦女，欺負弱勢者，chit款人除了ài受國法制裁以外，一定ē hông kí kah thok，犯tio̍h「眾人sōan」，眾人罵，所以做人tio̍h正經，chiah bē受人批評。

Chiâⁿ奇怪，tī chit回ê選舉，thài ē有人用chit種無雅氣ê話來kā人罵kā人lé，koh khah hō͘人想bē-hiáu ê tāi-chì，ná有人ka解說做是黃色話，對cha-bó͘人ê侮辱siàu-thé？台灣人無了解台灣話，lín chia ê知識者，讀hiah chē冊是leh創siáⁿ-hòe，爸母ê話講bē輾轉已經真失禮，爸母話ê意思koh sa無cháng，實在講bē得過。

Tī chia Siau Lah-jih boeh呼籲ta̍k-ê，爸母話tio̍h khah捷講--leh，用一寡精神教序細，boeh做台灣人，台灣人ê爸母話一定ài講ho͘好勢，特別是政治家，平常時tio̍h ài將咱ê爸母話khòa-tī嘴phóe，m̄-thang thèng-hāu選舉nā到，chiah來講hit款無水準ê台語，kā咱台灣人chau-that siàu-thé。

【註解】