〈126〉

一ê童乩，一ê桌頭

Chi̍t-ê tâng-ki, chi̍t-ê toh-thâu

1-ê員外，厝內有tāi-chì（無平安），boeh請神明問天機，到底siáⁿ原因，阮tau ná ē bē順序？

關神明tio̍h ài童乩，主人問桌頭，ē-àm ê點心boeh食siáⁿ-mih，tio̍h先叫人發落，半暝thang止飢。桌頭講：童乩siāng愛食米糕，kan-nā chit項to̍h可以。主人趕緊去發落，款好khǹg-tī桌頂，桌頭想pháiⁿ勢，kā伊徙tiàm桌腳下，khah bē去hō͘人gê-sé。

午夜開始起童，乩差起腳kho̍k-kho̍k chông，chông kah八仙桌前，目chiu激mi-mi，頭殼激lê-lê，1-ê ām-kún-á一直hàiⁿ一直搖：弟子--à！天靈靈！地冷冷！恁tau ê糞間，有怪奇，有垃圾無清。」 「XX公，弟子知影。」 桌頭解明：「垃圾to̍h是有pháiⁿ物á--lah，明á載糞間掃掃--leh，燒chi̍t-kóa紙錢，自然to̍h ē平安。」 「我知！我知！Iáu有--hoⁿh！弟子iáu有tāi-chì boeh問……」

突然間：「Kiu liu si̍p biu kiu！Kiu liu si̍p biu kiu！」 「XX公！你mā講分明，是siáⁿ tāi-chì？」 「Kiu liu si̍p biu kiu！Kiu liu si̍p biu kiu--lah！」 Taⁿ to̍h害，你leh講siáⁿ tāi？我桌頭ná ē聽bē來，「XX公！你koh講1-pái。」

Chit時chūn，1-ê gín-á-phí hiông-hiông發出言語：「Ah！狗leh食米糕！狗leh食米糕！」原來chit款tāi，一時ta̍k-ê笑hai-hai！「Kiu liu si̍p biu kiu！狗leh食米糕--ah！」

諸位，笑bóng笑，「一ê童乩，一ê桌頭。」Ta̍k-ê lóng知知，迷信siāng厲害，boeh信神，tio̍h ài「正信」khah實在，m̄管是信佛，信帝爺，信媽祖，信天主a̍h基督，lóng是勸人做善，m̄是叫你kah人tòe拜戇戇來，拜siáⁿ-mih？連ka-tī都m̄知。現實社會，人nā兩人套好，tàu-khang-á boeh kā你陷害，boeh kā你lo-so，親像金光黨án-ne「一ê童乩，一ê桌頭。」你tio̍h ài心神lia̍h ho͘在，m̄-thang hō͘人lia̍h去thâi。

註解

【註解】