〈145〉

有cha-bó͘-kiáⁿ賊，無外家虎

Ū cha-bó͘-kiáⁿ chha̍t, bô gōa-ke hó͘

講cha-bó͘ gín-á是菜籽á命，he是對嫁了m̄ tio̍h人，受人苦毒，無得tio̍h ang婿疼痛，ah是生活過了sàn赤艱苦ê cha-bó͘人講--ê。菜籽á mā有hit-lō iā-tī肥地，生tio̍h大欉koh幼jī，受人歡迎ê幸運者。

雖然講cha-bó͘-kiáⁿ飼大漢別人ê，mā有hit-lō爸母惜命命--ê，嫁了後，iáu oân-ná三、五工tio̍h轉後頭厝1-chōa，有食koh有lia̍h，人講：阿富嫂--à！恁cha-bó͘-kiáⁿ ná ē chiah好命，嫁人--ah koh有thang tong-tong轉來thit-thô！

有khah cho̍ah，jú捷轉來，jú hiau-hēng，koh ná像teh tio̍h賊偷--leh，m̄是che，to̍h是he，chit項也boeh ài，hit項也boeh ti̍h，加減sa加減好。咱a̍h m̄是無--ê，thài要緊！

M̄是leh m̄甘，驚做人khêng-hun，人in兄嫂雖然無講siáⁿ，m̄-kú心內m̄知影boeh án-chóaⁿ想。

Che to̍h是叫做chău-kiáⁿ賊，換倒轉來，nā是爸母去cha-bó͘-kiáⁿ hiah lo-so--leh，ka-tī chău-kiáⁿ bē khe-khó，kiáⁿ婿bē加講話，m̄-kú piⁿ--a ê人看--tio̍h ē án-chóaⁿ講？Kan-nā siuⁿ捷去tio̍h全話--了-了，親家親姆tio̍h看bē順眼，koh ē講he ùi鼻空出來ê閒á話，hō͘人食bē-ta，m̄ chiah khah古意khah sè-jī ê爸母，lóng無ài去tòa cha-bó͘-kiáⁿ hia siuⁿ久。驚做hō͘人誤會，失cha-bó͘-kiáⁿ ê面子。

「有cha-bó͘-kiáⁿ賊，無外家虎」，chit款觀念tio̍h改變，cha-po͘ cha-bó͘ lóng是kiáⁿ，爸母、ta-ke官lóng是序大，該疼該hō͘伊--ê，該有孝該侍候，lóng照義理行，ná thang看做賊，認做虎，to̍h有影失感情。

【註解】