〈142〉

惹熊惹虎，m̄-thang惹tio̍h chhiah cha-bó͘

Jiá hîm jiá hó͘, m̄-thang jiá tio̍h chhiah cha-bó͘

台灣有狗熊，有石虎，無真正ê虎。熊kah虎lóng ē hō͘人驚，因為伊ē咬人，所以講tio̍h熊kah虎to̍h hō͘人驚kah boeh死去。

M̄知siáⁿ原因ná ē將熊、虎kah chhiah cha-bó͘黏做夥，chhiah cha-bó͘ kám有影hiah厲害，hiah顧人怨，che可能是「大男人主義」心態leh作怪。Cha-po͘人ē-tàng ok-khia̍k-khia̍k，kám講cha-bó͘人to̍h bē-tàng chhiah-pê-pê？

Chín ê時代流行女強人，好親像敢學cha-po͘人ê chhèng、ok、好勝、倔強，to̍h是chhiah cha-bó͘、女強人，所以咱tī民主ê殿堂時常看tio̍h cha-bó͘委員、代表，講tio̍h話，嚨喉大khang，nā chang tio̍h 1-sut-á道理to̍h無管對方siáⁿ-mih人，一聲你leh創siáⁿ，你kám m̄知，你ài落台，聲嗽bē-bái，chiâⁿ hiau-pai。Kám講án-ne to̍h是女英才？

M̄ tio̍h，m̄ tio̍h，m̄是án-ne，cha-po͘人ài phùi，ài表現淡薄á江湖氣口，he m̄是真正ê棟才，女男平等ê時代，cha-bó͘人mā bē-tàng例外，nā講真正ê chhiah cha-bó͘，tio̍h ài提起這pái參選縣市長ê張博雅、翁金珠、張溫鷹、呂秀蓮kah周荃五位女士，各人為各人ê理想m̄認輸，boeh kah cha-po͘人ê陣容君子piàⁿ看māi，看in ê內涵，看in ê風度，正是女強人、chhiah-cha-bó͘，tn̄g tio̍h kah in piàⁿ生死ê cha-po͘候選人，tio̍h覺悟，「惹熊惹虎，m̄-thang惹tio̍h chhiah cha-bó͘。」Ta̍k-ê tio̍h小心，實在有thang piàⁿ--leh！

【註解】